Kreu i Grupit Parlamentar të PD, Gazment Bardhi i është përgjigjur deklaratave të Presidentit Begaj, pas mbylljes së seancës së shkurtër në Kuvend si pasojë e kaosit dhe zhurmës së krijuar nga ‘Rithemelimi’.
Teksa i përgjigjet Presidentit, Bardhi shprehet se dha një mesazh të dëmshëm, pasi thekson se nuk u ngrit dot në rolin e tij si përfaqësues i unitetit të popullit, por foli me gjuhë të njëanshme.
Reagimi:
Qëndrimi publik i Presidentit të Republikës është mesazhi më i dëmshëm që mund të bënte për normalizimin e jetës parlamentare.
Ashtu siç pritej, Kreu i Shtetit nuk u ngrit dot në rolin e tij si përfaqësues i unitetit të popullit, por me një gjuhë të njëanshme, u bë palë në konflikt dhe nxiti edhe më shumë përçarjen mes palëve politike në Kuvend.
Duke e konsideruar këtë një akt antidemokratik dhe një sulm të pashembullt të Presidentit të Republikës ndaj opozitës, e siguroj që Grupi Parlamentar i PD dhe opozita është e vendosur të mbrojë pluralizmin demokratik në vend dhe Kushtetutën e Shqipërisë, edhe nëse Kreu i Shtetit ka vendosur t’ja dorëzojë kopjen e tij të Kushtetutës kryeministrit Edi Rama!
/abcnews.al/
