Elseid Hysaj më 1 korrik del lojtar i lirë, pasi kontrata me Napolin i përfundon. Deri më tani nuk ka pasur një marrëveshje për rinovimin, ndërkohë që menaxheri i mbrojtësit shkodran, Mario Giuffredi, ka folur për “Radio Punto Nuovo”.
“Muaji maj do të jetë vendimtar për të ardhmen e tij. Elseidi është një lojtar i nivelit të lartë dhe meriton një klub të nivelit të parë.
Janë klube të rëndësishme ato që e duan. Nëse Hysaj lë Napolin, Napoli është klubi që do të humbasë, edhe nëse nuk e dini të ardhmen e tij dhe të Gatussos.
Janë 4-5 opsione për të cilët po punojmë për Hysajn, 2-3 në Itali dhe dy të tjera jashtë. Klubet italiane janë të nivelit të lartë, me një histori të rëndësishme”, është shprehur Giuffredi.
Për Hysajn në Italia janë lakuar klube si Milani, Roma e Fiorentina, ndërkohë që as rinovimi me Napolin nuk është përjashtuar përfundimisht si opsion, edhe pse shanset janë të vogla që të ndodhë. /abcnews.al
