Elseid Hysaj ishte një nga më të mirët e Napolit në ndeshjen kundër Milanit. Shkodrani është vlerësuar pozitivisht për paraqitjen e tij, ndërkohë që menaxheri i tij, Mario Giuffredi, ka folur sërish për të ardhmen e tij në Radio Marte, gjatë transmetimit të emisionit “Si gonfia la rete”.
Kur i vënë në dukje paraqitjen e mirë me Milanin, menaxheri i mbrojtësit të kombëtares shprehet: “Asnjëherë nuk kam pasur dyshime për profesionalizmin dhe seriozitetin e djalit. Është mirë të shohësh që gazetarët dhe tifozët e vlerësojnë atë.
Kjo do të thotë që ata e dinë sa serioz është dhe se sa është i lidhur me fanellën, edhe pse kontrata i skadon”. Më 30 qershor Hysaj del lojtar i lirë dhe Giuffredi është i qartë në atë që thotë për të ardhmen e mbrojtësit të krahut të djathtë, që Gattuso e ka përdorur edhe në krahun tjetër.
“Me 99% do të largohet. Është njëlloj sikur ke 5 vite me një të dashur dhe më pas zihesh çdo ditë. Tani është e drejta e lojtarë të shkojë aty ku vlerësohet më shumë. Nuk e ka problem të gjejë skuadrën. Një futbollist me CV-në dhe moshën e tij është një çek për t’u arkëtuar”, është shprehur Giuffredi. /abcnews.al
