Mehmeti “godet” sërish/ Futbollisti shqiptar e bën “sefte” edhe në Kupën e Anglisë

Nuk ka ndërmend që të ndalet.

Anis Mehmeti po tregon këtë fillim viti, të njëjtën formë me të cilën e mbylli 2025-ën.

Futbollisti ofensiv shqiptar shënoi golin e radhës, të dytin në 2026, këtë herë në Kupën e Anglisë.

Bristol Siti fitoi bindshëm në raundin e tretë, 5-0 ndaj Uatfordit në shtëpi, dhe Mehmeti realizoi për 2-0 në 37’.

Në fushë u mbajt vetëm 58’ për t’u ruajtur, ndërsa këtë vit golat u bënë dy, e madje në vetëm 10 ditë.

Më parë, realizoi në portën e Portsmuthit, sërish në shtëpi dhe sërish në një fitore të thellë 5-0 në kampionat.

Ylli kuqezi, që ka luajtur tri ndeshje me ekipin përfaqësues, po luan padyshim edicionin e jetës në kategorinë e dytë angleze, një ligë tepër e fortë që mund të krahasohet me shumicën e superligave në Europë, me përjashtim të atyre të pesë vendeve kryesore.

Me 9 gola e 6 asistë gjithsesj, ai ka tërhequr vëmendjen duke qenë lojtari më I mirë I Bristol Sitit, dhe njëri nga më të dalluarit në Championship.

Klubi po bën përpjekje për ta mbajtur, sepse kontrata e Anis Mehmetit përfundon në qershor.

Ndërkaq, kjo formë deri tani nuk i ka vlejtur për t’u kthyer në kombëtare pas dy vitesh e gjysmë.