Pas vendimit për mbylljen e pishinave, si masë kundër Covid 19, po lulëzon konkurrenca e pandershme.
Të konsideruara si aktivitete me risk të lartë infektimi, në urdhëresën e Komitetit Teknik të Ekspertëve pishinat ndaloheshin deri në datën 23 qershor, duke lënë vend për interpretim. Kështu shumë biznese rihapën pishinat, por u përballën me gjoba të majme dhe u kthyen përsëri në pikën zero.
Duke iu referuar shifrave në rritje të të prekurve me COVID, Ministria e Shëndetësisë ka marrë vendimin e menjëhershëm për mbylljen e pishinave në të gjithë territorin e vendit, deri në një njoftim të dytë. Por, jo të gjithë bizneset e kanë respektuar këtë vendim.
Ne redaksinë e emisionit ABC e mëngjesit ka ardhur një denoncim nga drejtuesit e “Adriatik Hotel”, një prej hoteleve më të mëdha në qytetin e Durrësit.
Menaxherja Sarah Golja thotë se pishina e hotelit qëndron e mbyllur prej që prej datës 29 Maj duke u sjellë dëme të mëdha financiare.
- LEXO EDHE: Nuk ka prova për rrezik përhapje të Covid, Italia vendosi hapjen e pishinave që në 25 maj
“Pas mbylljes së pishinës morëm shumë ankesa nga klientët, disa prej tyre madje u larguan, sepse ne kemi shumë turistë e familjarë që vijnë specifikisht për pishinën. Jo vetëm që u larguan klientët aktual, por turistë të tjerë largohen në vende të tjera kur u themi që pishina është mbyllur.”
Sipas drejtuesve, pishina e tyre i respekton të gjitha rregullat për mospërhapjen e covidit, pasi është me ujë deti.
“Pishina jonë është me ujë deti nuk është si të tjerat , unë këtu kam edhe analizat e ujit që janë bërë nga shteti jo nga privati që vërtetojnë se uji jonë është i shëndetshëm. Uji filtrohet çdo 4 orë dhe studime nga Organizata Botërore e Shëndetit ose nga Universiteti I Michiganit,tregojnë se uji i detiti është i padëmshëm. Këta e dinë dhe vetë përderisa kanë lejuar plazhin.”, shprehet menaxherja.
Golja thotë se në një verë normale kapaciteti I hotelit do të ishte 100% , por për shkak të pandemisë dhe mbylljes së pishinës hoteli po funksionon me 20% të kapacitetit. E pyetur nga gazetarja Romina Braho se nëse rrezikohet mbyllja e hotelit për shkak të mbylljes së pishinës Golja është shprehur:
“Fatkeqësisht po! Këtu janë 100 vetë staf që duhen paguar, por nuk kanë se kujt ti shërbejnë pasi nuk është mbushur as gjysma e hotelit.”
Por, nga ana tjetër, emailit dhe mesazhet e shumta që kanë drejtuesit e hotelit kanë dërguar në instancat përkatëse duket se kanë rënë në vesh të shurdhër.
Përfaqësuesi ligjor i hotelit, Endri Çela, thotë se shumë hotele të tjera i kanë pishinat hapur, ndërkohë përgjigja nga portali “ Shqipëria që duam” ishte se sipas kontrolleve të tyre në terren asnjë pishinë nuk është e hapur dhe se vetëm një prej subjekteve kishte marrë paralajmërim pasi pronarët nuk e dinin se pishinat ishin të ndaluara.
“Ne do e çojmë çështjen deri në fund sepse po shikojmë që po zhvillohet një konkurrencë e pandershme që po na dëmton shumë.”, shprehet Çela.
Mjafton një kërkim i thjeshtë në rrjetet sociale nga publikimet e disa subjekteve, por edhe qytetarëve, për të kuptuar se disa pishina janë ende në funskionim duke thyer haptazi vendimin e Komitetit Teknik të Ekspertëve dhe Ministrisë së Shëndetësisë. /abcnews.al
