Të premten u shënuan dy vite nga vrasja e gazetarit saudit Jamal Khashoggi, brenda konsullatës saudite në Stamboll. Kolumnisti 59-vjeçar i Washington Post vdiq më 2 tetor të vitit 2018, pasi hyri në konsullatë për të marrë disa dokumente për martesën e tij.
Trupi i tij, për të cilin thonë se u copëtua nga oficerët sauditë nuk u gjet kurrë. Qeveria Saudite ka mohuar në mënyrë të vazhdueshme çdo përfshirje në atentat.
Ndërkohë, aktivistët dhe grupet e të drejtave të njeriut deklaruan se vrasja ishte e planifikuar dhe sipas tyre ajo ishte kryer me urdhrin e Princit të Kurorës Saudite, Mohammed Bin Salman, sundimtari ‘de facto’ i mbretërisë, një akuzë që Riadi e pati mohuar.
Në muajin shtator, autoritetet saudite dënuan tetë të dyshuar për vrasjen e gazetarit. Pesë nga të pandehurit u dënuan me 20 vite burg, një me 10 vite dhe dy me shtatë vite burg.
Ata nuk i zbuluan identitetet e tyre, duke forcuar edhe më shumë akuzat se gjyqi ishte thjesht një mbulim i procesit. /abcnews.al
