Loading ...
Mbretëria e Bashkuar dhe India kanë nënshkruar një “marrëveshje të lirë tregtare ambicioze dhe reciprokisht të dobishme”, sipas kryeministrit indian Narendra Modi.
Kryeministri indian deklaroi se kjo marrëveshje do të “thellojë partneritetin strategjik gjithëpërfshirës, do të nxisë tregtinë, investimet, rritjen ekonomike, krijimin e vendeve të punës dhe inovacionin”. Ai gjithashtu u shpreh se mezi pret ta mirëpresë Keir Starmer në Indi.
Qeveria britanike ka bërë të ditur se me këtë marrëveshje, tarifat doganore do të “shkurtohen ndjeshëm”.
India do të ulë tarifat për 90% të importeve nga Britania e Madhe, ku 85% e tyre do të bëhen pa taksa brenda një dekade.
Tarifat për uiskin dhe xhinin do të përgjysmohen nga 150% në 75%, për të zbritur në 40% deri në vitin e 10-të të marrëveshjes. Ndërkohë, tarifat për automjetet do të ulen nga mbi 100% në 10%, nën një sistem kuotash.
Tarifa të reduktuara do të aplikohen gjithashtu për mallra të tjera si rrobat, kozmetika, produktet e industrisë ajrore, mishin e qengjit, disa produkte ushqimore dhe pije.
Qeveria britanike vlerëson se kjo marrëveshje do të rrisë tregtinë dypalëshe me 25.5 miliardë £ dhe Prodhimin e Brendshëm Bruto të Mbretërisë së Bashkuar me 4.8 miliardë £.
Keir Starmer e quajti marrëveshjen një “arritje historike” që “do të ndihmojë ekonominë dhe do të sjellë përfitime për popullin dhe bizneset britanike”.
