Mbi 200 të vdekur pas rrëshqitjes së dheut në një minierë në lindje të Kongos

Më shumë se 200 persona, përfshirë rreth 70 fëmijë, kanë humbur jetën pas një rrëshqitjeje të madhe dheu që shkaktoi shembjen e një zone minerare në lindje të Kongos, sipas autoriteteve qeveritare.

Ngjarja ndodhi në zonën minerare të Rubaya, burimi më i madh i koltanit në vend, pas reshjeve të dendura të shiut. Kjo zonë ndodhet rreth 70 km në perëndim të qytetit Goma, kryeqyteti i provincës North Kivu, dhe aktualisht kontrollohet nga rebelët e M23

Në një deklaratë zyrtare, ministria e minierave e qeverisë së Kongos fajësoi rebelët për tragjedinë, duke thënë se ata lejojnë nxjerrje të paligjshme të mineraleve pa standarde sigurie. Sipas ministrisë, kjo ka lënë punëtorët pa mbrojtje bazë në një zonë shumë të rrezikshme.

“Bilanci paraprak tregon më shumë se 200 bashkëkombës të vdekur, përfshirë 70 fëmijë dhe shumë të plagosur,” thuhet në deklaratë.

Megjithatë, rebelët e M23 nuk kanë komentuar ende. Një burim lokal në Rubaya i tha BBC se shembja ishte shkaktuar nga sulme të forcave qeveritare dhe se numri i viktimave ishte vetëm gjashtë. Qeveria nuk ka reaguar ndaj këtij pretendimi.

Minierat e Rubaya besohet se përmbajnë rreth 15% të furnizimit botëror me koltan dhe rreth gjysmën e rezervave të DR Kongos. Ky mineral përmban tantal, i cili përdoret për prodhimin e kondensatorëve me performancë të lartë në pajisje elektronike si telefonat dhe kompjuterët.  / abcnews.al /