Massimo Brambati ka krijuar polemika në Itali, pas një deklarate të lëshuar në rrjetet sociale. Mes të tjerash ai shprehej se Thomas Strakosha është infektuar me koronavirus. Deklarata e tij ka marrë dhenë, teksa është publikuar nga media të ndryshme në Itali.
Sigurisht që edhe Strakosha e ka lexuar lajmin, që është përgënjeshtruar nga Dimitri, vëllai i tij. “Duhet të keni turp që përhapni gënjeshtra dhe nëse nuk do të respektonim moshën tuaj, unë personalisht do t’ju padisja për informacion të rremë”, shkruan vëllai i portierit të Lazio.
DEKLARATA E BRAMBATI – Massimo Brambati, ish-futbollist i Torino dhe Bari, në një lidhje direkte me Instagram me gazetaren Giovanna Martini, deklaronte: “Janë dy lojtarë, një nga Milani dhe një nga Lazio, të cilët kanë dalë pozitivë me koronavirus.
I Lazios është Strakosha dhe për të thonë se ka një dëmtim në këmbë. Kjo nuk është e vërtetë. Ai ka bërë një test dhe ka dalë pozitiv. Nuk e di në lidhje me dëmtimin e Ibrahimovic, por Kessie i Milanit. Meqenëse u kthye nga Afrika së bashku me Gervinho, edhe ai është futur në karantinë”, ka deklaruar Brambati./abcnews.al
