Aleksis Tsipras dhe Zoran Zaev mund të jenë kandidatë për çmimin Nobel për Paqen vitin e ardhshëm. Fituesja e Nobelit për Paqen në vitin 2015, ekonomistja tuniziane Uided Bushamaui, ka deklaruar se do të nominoje kryeministrat Zoran Zaev dhe Aleksis Tsipras për çmimin e ardhshëm, për të vlerësuar angazhimin e tyre në arritjen e marrëveshjes së Prespës.
“Personalisht e konsideroj marrëveshjen në fjalë një proces jashtëzakonisht domethënës, që meriton të emërohet për çmimin Nobel”, ka deklaruar Bushamaui.
Ekonomistja tuniziane, e cila ndodhet në Shkup, ka thënë se pakti i arritur mes Zaev dhe Tsipras duhet të shërbejë si shembull për konteste të tjera nëpër botë. Maqedonia dhe Greqia nënshkruan marrëveshjen e Prespës në qershor, që i jep zgjidhje përplasjes dhjetëravjeçare për emrin dhe i hap rrugën e integrimit ish-republikës jugosllave. /abcnews.al
