Sulmuesi i ri i Juventusit, Federico Chiesa, nuk po shkëlqen tek bardhezinjtë. I këtij mendimi është edhe Claudio Marchisio, i cili thekson se shuma e paguar për kartonin e tij është mbi normale. Gjithsesi ish-juventini beson se është thjesht çështje kohe që ai të përshtatet në klubin e ri dhe të shpërthejë siç ka bërë te Fiorentina.
“Chiesa është një talent i vërtetë, por mbi të ka shumë presion. E gjithë kjo situata ka ardhur nga tregu i merkatos. Nuk është e drejtë që një lojtar si ai, i cili luftonte për mbijetesë në Firence, të kushtojë 50-60 milionë euro”, deklaron italiani për “La Gazzetta dello Sport”.
“Kur shkon në një klub si Juvja, Federico duhet të tregojë menjëherë vlerat e tij. Për një lojtar të ri do të ishte më e lehtë nëse do të ishte një shifër tjetër e paguar për shërbimet e tij. Chiesa duhet të gjejë pozicionin e duhur në fushë dhe sipas mendimit tim ai shumë shpejt do të shpërthejë dhe do të kthehet në një yll”, përfundon Marchisio. /abcnews.al
