Presidenti francez Emmanuel Macron, kancelari gjerman Olaf Scholz dhe presidenti i Këshillit Evropian Charles Michel riafirmuan “mbështetjen e tyre të palëkundur” për Armeninë pas takimit me kryeministrin armen Nikol Pashinyan.
“Macron, Scholz dhe Michel theksuan mbështetjen e palëkundur për pavarësinë, sovranitetin, integritetin territorial dhe paprekshmërinë e kufijve të Armenisë”, theksohet në një deklaratë të lëshuar pas këtij takimi të zhvilluar në Granada të Spanjës, në kuadër të samitit të BE-së.
“Në të njëjtën kohë, të tre ata shprehën mbështetjen e tyre për forcimin e marrëdhënieve Bashkimi Evropian-Armeni, në të gjitha dimensionet e marrëdhënieve, bazuar në nevojat e Republikës së Armenisë”, thuhet në deklaratë.
Takimi vjen dy javë pas fitores dërrmuese ushtarake të Azerbajxhanit, në të cilën ai mori kontrollin e Nagorno-Karabakut, një enklavë e territorit të Azerbajxhanit të banuar nga armenë. Pas fitores ushtarake të Baku, mbi 100,000 banorë të rajonit u larguan në Armeni.
Bisedimet midis Armenisë dhe Azerbajxhanit pritej të ishin një nga temat e diskutuara në samit, por presidenti i Azerbajxhanit Ilham Aliyev nuk shkoi në Granada i patrazuar nga mbështetja evropiane për Armeninë.
Michel u tha gazetarëve se do të ftonte Pashinyan dhe Aliyev për një takim në Bruksel deri në fund të tetorit.
