Loading ...
Presidenti francez Emmanuel Macron ka paralajmëruar për një rritje të kërcënimit të sulmeve hibride nga Rusia kundër Evropës dhe Francës.
Macron foli në një konferencë për mediat pas një takimi me liderët e partive për të diskutuar ndikimin në siguri të luftërave në Lindjen e Mesme dhe në Ukrainë.
Ai njoftoi se i kishte kërkuar qeverisë franceze të përgatiste një plan për mbrojtjen e infrastrukturës kritike dhe objekteve të industrisë së mbrojtjes përballë këtij kërcënimi dhe theksoi se sulmet nuk do të mbeten “pa përgjigje”.
“Në javët e fundit, kërcënimi hibrid rus kundër evropianëve dhe kundër Francës është intensifikuar. Synimi është të na frikësojnë dhe të thyejnë përpjekjet tona për të mbështetur Ukrainën. Rezultati do të jetë krejt i kundërt. Ne nuk frikësohemi, sepse e dimë që siguria jonë sot dhe nesër varet nga ajo që ndodh në Ukrainë”, tha Macron.
Një numër në rritje udhëheqësish evropianë kanë paralajmëruar se Rusia mund të jetë duke përgatitur sulme për të testuar vendosmërinë e tyre për të mbështetur Ukrainën.
Macron përmendi tentativën për sulm me dron në aeroportin e Lajpcigut në Gjermani si dhe deklaratat e kryeministrit polak Donald Tusk, i cili paralajmëroi se Rusia po planifikonte sulme me dronë dhe raketa kundër Polonisë dhe vendeve të tjera në krahun lindor të NATO-s.
Macron gjithashtu njoftoi se Franca do të thërrasë një takim të vendeve të G7 për të diskutuar çështjet e energjisë dhe për të ngritur çështjen e rezervave të gazit me Komisionin Evropian.
Macron shtoi se takimi “do të jetë gjithashtu një mundësi për të shqyrtuar opsionet për një lirim të mundshëm të rezervave strategjike.”
