Grevat që bllokojnë dërgesat e karburantit nga rafineritë franceze u zhvilluan në ditën e gjashtë të hënën, duke shtuar presionin mbi presidentin Emmanuel Macron, ndërsa ai kërkon mbështetje për reformën e pensioneve në një votim përfundimtar në parlament.
Përveç bllokimit të rafinerive kryesore të Francës, transporti hekurudhor po ndërpritet dhe mbeturinat po grumbullohen në rrugët e Parisit dhe qyteteve të tjera franceze si rezultat i grevave të vazhdueshme të nisura javën e kaluar në sektorë të tjerë të ekonomisë, shkruan Reuters.
Megjithëse Senati francez miratoi të shtunën projektligjin , masa kryesore e të cilit është rritja e moshës së pensionit me dy vjet në 64, ai ende përballet me pengesa parlamentare përpara se të bëhet ligj, veçanërisht në Asamblenë Kombëtare, ku mbështetësit e Macron nuk kanë një shumicë të plotë.
Hapi tjetër, i planifikuar për të mërkurën, është mbledhja e një komiteti të përbashkët të ligjvënësve të dhomës së ulët dhe të lartë, nga shtatë secila, për të rënë dakord mbi një version përfundimtar të projektligjin.
Momenti i fundit do të ishte një votim përfundimtar, të enjten, si në Senat ashtu edhe në Asamblenë Kombëtare./abcnews.al
