Spanjë-Gjermani është përballja më e fortë e ditës së nesërme në Nations League. Dy kombëtaret e mëdha janë pjesë e grupit 4. “Pancerat” mjafton të mos humbasin për të ruajtur vendin e parë, teksa djemtë e Luis Enrique nuk kanë alternativa përveç fitores.
Trajneri i Gjermanisë, Joachim Low ka folur rreth kësaj sfide në konferencën për shtypin, aty ku vlerëson kundërshtarët iberike dhe tregon se çfarë duhet të bëjnë djemtë e tij.
“Është diçka e mirë fakti që e kemi ne në dorë mundësinë për ta mbyllur në vend të parë. Spanjë është një nga kombëtaret më të forta në botë, do të jetë një ndeshje e madhe.
Duhet të jemi në gjendje për t’u përballur me stilin e tyre të lojës dhe ka rëndësi të madhe të luajmë me ekuilibrin e duhur, të shënojmë dhe ta menaxhojmë ndeshjen sa më mirë“, deklaron Low. /abcnews.al
