Loading ...
Gjykata e Pogradecit vendosi arrest me burg për Ligor Bibën i akuzuar për përdhunimin e një 15 vjeçareje e cila aktualisht është disa muajshe shtatzënë. Në seancë nuk kanë qenë të pranishëm as familjarët e të miturës dhe as ata të autorit të dyshuar.
55 vjeçari që dyshohet se ka përdhunuar fqinjën e mitur do të qëndrojë në qeli. Gjykata e Pogradecit vendosi burg për Ligor Bibën. Prokuroria referuar dëshmisë së të miturës kërkoi masën e arrestit me burg si dhe dërgimin e çështjes në Gjykatën e Korçës pasi Gjykata e Pogradecit nuk është kompetente për shkak të mungesës së seksionit të të miturve.
Mbrojtësi i të akuzuarit i konsideroi provat e prokurorisë të pavlefshme pasi akuza jo vetëm që nuk vërteton dot përdorimin e dhunës, por as faktin që 55 vjeçari ka kryer marrëdhënie me të miturën. Fakti që ngjarja është dënoncuar pas 8 muajsh argumentoi mbrojtësi i 55 vjeçarit përjashton mundësinë që ndaj vajzës të jetë ushtruar dhunë gjatë kryerjes së aktit. Për më tepër që gjatë këtyre 8 muajve e mitura nuk ka shfaqur shenja psikologjike që shoqërojnë një përdhunim të mundshëm.
Pas konkluzionit të palëve, gjykata vendosi të lerë në burg Ligor Bibën mbi të cilin rëndon akuza e kryerjes së marrëdhënieve seksuale me dhunë me të mitur. Tre ditë më parë 15 vjeçarja nga fshati Velçan i Pogradecit denoncoi në polici fqinjin e saj duke e akuzuar se e kishte përdhunuar dhe lënë shtatzënë në mars të këtij viti.
https://youtu.be/KWI5W-n1L8g
