Lazio po kalon një formë shumë të mirë në kampionat. Ekipi i Inzaghit ka fituar të gjashtë ndeshjet e fundit dhe renditet në vend të tretë me 30 pikë, 7 më pak se Interi kryesues dhe 6 më pak se Juventusi. Ndeshja e radhës është kundër kampionëve në fuqi.
Lazio pret ekipin e Sarrit në “Olimpico” të shtunën dhe Thomas Strakosha nuk i trembet bardhezinjve. Në një prononcim për Lazio Style Radio, 24-vjeçari shqiptar tregon rëndësinë e madhe që ka mbështetja dhe dashuria e tifozëve, teksa analizon dhe duelin e fundjavës kundër Juventusit.
TIFOZËT – “Kemi nevojë për mbështetje dhe diçka e tillë na karikon për të ecur përpara. Tifozët na mbështesin në stadium, por edhe kur i takojmë në përditshmërinë tonë. Nuk kam kryer asnjë pritje në ndeshjen e fundit? Diçka shumë e mirë, do të thotë se skuadra nuk i ka lënë hapësira kundërshtarëve”.
JUVENTUS – “Të shtunën na pret një ndeshje e rëndësishme për ecurinë tonë. E dimë se çdo pikë ka vlerë, por nuk i frikësohemi askujt. E respektojmë Juventusin, janë një skuadër e madhe, por ne duam të japim maksimumin dhe të vazhdojmë në rrugëtimin tonë”. /abcnews.al
