Nëse në herët e tjera ishin kufizimet prej Covid-19 dhe bllokadat e klubeve për të lënë të lirë lojtarët e tyre, tashmë pengesa e madhe për Alban Bushin te kombëtarja Shpresa janë dëmtimet.
FSHF doli para pak çastesh menjë njoftim, ku tregon shqetësimet e disa futbollistëve dhe largimin e talentit të Empolit, Kristjan Asllani. Këtë të fundit e zëvendëson 17-vjeçari i Bylisit, Marcelino Preka, që ka arritur të zbresë 11 herë në fushë në Superiore këtë sezon.
NJOFTIMI – Kombëtarja shqiptare U-21 ka nisur të martën grumbullimin në kuadër të dy ndeshjeve që janë në program në muajin qershor, atë ndaj Andorrës në transfertë për eliminatoret e Kampionatit Europian 2023, dhe miqësores ndaj Bullgarisë po jashtë fushe.
Skuadra është grumbulluar në hotel “Dyrrah” në Durrës, ndërkohë që paraditen e të enjtes ka zhvilluar një seancë të plotë stërvitore.
Zyra e shtypit në FSHF bën me dije se mbrojtësi Ramen Çepele ka pasur probleme fizike dhe i është nënshtruar analizave mjekësore. Lojtari po mbahet nën vëzhgim nga stafi mjekësor dhe do të vlerësohet në vazhdimësi nëse do të jetë ose i gatshëm dy ndeshjet e radhës me U-21.
Gjithashtu, edhe mesfushori Kristjan Asllani, i cili ka qenë i pranishëm në grumbullim ka pasur probleme fizike. Pas konsultave me stafin mjekësor, është arritur në përfundimin se Asllani nuk mund të jetë i gatshëm për dy ndeshjet që Kombëtarja U-21 do të zhvillojë, duke lënë kështu grumbullimin me Kombëtaren.
Në këto kushte, trajneri Alban Bushi ka vendosur të thërrasë mbrojtësin 17-vjeçar, Marçelino Preka, i cili është bashkuar që sot me kuqezinjtë. Ky nuk është ndryshimi i vetëm pasi qysh në fillim të grumbullimit u largua sulmuesi Ernest Muçi, i cili pati gjithashtu probleme dëmtimi dhe nuk mund të rikuperohet për të luajtur këto dy ndeshje. /abcnews.al
