Akreditimi i laboratorëve mjekësor për testimin e Covid 19 nga Drejtoria e Përgjithshme e Akreditimit nuk është kusht për funksionimin e tyre.
Kjo është përgjigja e Drejtorisë së Përgjithshme të Akreditimit pyetur nga ABC pas raportit të Kontrollit të Lartë të Shtetit.
Ndërkohë që KLSH në raport deklaronte se kjo drejtori është përjashtuar nga akreditimi i aparaturave laboratorike dhe se kompetencat i ka marrë Komiteti Teknik i Ekspertëve dhe Ministria e Shëndetësisë duke cënuar vërtetësinë e të dhënave për Covid 19, Drejtoria e Përgjithshme e Akreditimit i tha Abc se;
“Kriteret për licensimin e një laboratori mjekësorë dhe procedura për licensim vendosen dhe kryhet nga Ministria e Shëndetësisë.”
Ministria e Shëndetësisë nga 30 korriku i vitit 2020 deri tani për të kryer analizat për Sars CoV 2 ka licensuar 12 laboratorë privat. Ndërkohë Drejtoria e Përgjithshme e Akreditimit tha për ABC se ajo nuk ka akredituar asnjë laborator për testimin e koronavirusit.
Drejtoria e Përgjithshme e Akreditimit pranë Ministrisë së Ekonomisë akrediton laboratorët testues, kalibrues, mjekësor sipas standardeve ISO.
Standarde menaxheriale dhe teknike për të cilat në të gjithë botën akreditimi është opsional jo detyrues.
Në Shqipëri Drejtoria e Përgjithshme e Akreditimit aktualisht e ka të pamundur akreditimin e laboratorëve mjekësor të testimit të Covid 19 pasi burimet i thanë ABC se ajo ende nuk ka hartuar politikat e duhura për këtë çështje./abcnews.al
