Loading ...
Nga arena e cirkut te galeritë e artit, rrugëtimi i Edison Abazit është një histori guximi, transformimi dhe pasioni. Për 19 vite ai ishte pjesë e Cirkut të Tiranës si xhongler, por mbyllja e aktivitetit e vendosi përballë një prej sfidave më të mëdha të jetës së tij.
Tetë vite më parë, i gjendur përballë pasigurisë për të ardhmen, Edisoni vendosi të provojë diçka krejt ndryshe. Pa e ditur se ku do ta çonte ajo zgjedhje, ai nisi të eksperimentonte me gozhda, fije peri dhe dru. Ajo që filloi si një kuriozitet i thjeshtë, shumë shpejt u kthye në profesionin dhe pasionin e tij të madh.
“Kur ndërpreva punën në cirk nuk e dija çfarë do të bëja me jetën time. Videot në YouTube më frymëzuan të provoja një teknikë të re dhe gradualisht kuptova se mund të krijoja vepra të vërteta arti”, tregon ai.
Sot, Edison Abazi është një nga artistët shqiptarë më të veçantë të teknikës String Art, një formë arti që kombinon qindra apo mijëra gozhda me kilometra fije për të krijuar portrete, peizazhe dhe kompozime artistike mbresëlënëse.
Procesi është sa i ndërlikuar, aq edhe magjepsës. Gjithçka nis me një skicë të detajuar mbi bazën e drurit. Më pas vendosen me kujdes gozhdat sipas kontureve të figurës dhe në fund fillon puna me fijet, të cilat lidhen në mënyrë të tillë që krijojnë imazhin përfundimtar.
Portretet mbeten sfida më e madhe për të. Sipas artistit, ato kërkojnë saktësi ekstreme dhe një durim të jashtëzakonshëm. Një nga veprat më të vështira ka qenë “Bebja me sy blu”, për realizimin e së cilës u deshën tre muaj punë intensive, 12 deri në 14 orë në ditë, 3.5 kilogramë gozhda dhe rreth 4500 metra fije peri.
“Ka pasur raste kur kam punuar me javë të tëra dhe në fund më është dashur ta çmontoj të gjithë veprën sepse nuk më ka pëlqyer rezultati. Ky art kërkon shumë durim dhe perfeksionizëm”, shprehet ai.
Një tjetër vepër që i ka marrë shumë kohë është “Femra Shqiptare”, ndërsa në punimet abstrakte ka përdorur deri në 5.5 kilogramë gozhda. Çmimi i një vepre përcaktohet nga koha dhe puna që kërkon realizimi i saj, me disa prej tyre që arrijnë vlera prej mijëra eurosh.
Pavarësisht se sot jeton dhe punon në Republikën Çeke, Edisoni mbetet i lidhur fort me Shqipërinë. Ai thotë se vendlindja dhe familja janë burimi i energjisë dhe motivimit të tij, ndërsa Cirku i Tiranës vazhdon të mbetet një pjesë e pazëvendësueshme e kujtimeve të tij.
Ambicia e tij është e qartë: të bëhet një nga artistët më të mirë të String Art në Europë. Dhe duke parë rrugën që ka ndjekur deri tani, duket se gozhdat dhe fijet kanë ndërtuar shumë më tepër sesa vepra arti – ato kanë ndërtuar një histori suksesi që frymëzon.
