Gianni Infantino, presidenti i FIFA, është i qartë: futbolli do të rikthehet vetëm kur të jenë kushtet e duhura dhe të mos rrezikohet shëndeti i njerëzve. Kreu i qeverisë së futbollit botëror diskutoi me Ronaldo Fenomenin, në një lidhje direkte në “Instagram”.
“Do të rikthehemi të luajmë kur qeveritë të japin “OK”-in. Deri atëherë do të duhet të presim, edhe nëse do të duhet disa muaj. Sot futbolli nuk është aq i rëndësishëm sa shëndeti. Përparësi ka shëndeti i njerëzve”, u shpreh fillimisht Infantino.
Më tej, gjatë diskutimit me brazilianin, ai shtoi: “Askush nuk e priste këtë që ndodhi dhe nuk ishim të përgatitur. Po shohim pamje të tmerrshme dhe futbolli nuk është përparësi tani. Së pari shëndeti. Sa kohë ka rrezik, nuk luajmë. Situata është serioze.
Kur dëgjoj që njerëzit po luftojnë, them se duhet të fillojmë atëherë kur të mundemi. Ndoshta në korrik, gusht, nuk e dimë. Duhet të përgatitemi kur qeveritë të na japin dritën jeshile. Por nuk është e drejtë për ata që vuajnë, që ne të flasim për të luajtur futboll. Do luajmë kur të kemi mundësi. Të qëndrojmë pozitivë, kjo ka rëndësi”. /abcnews.al
