Skuadra e Kukësit ka gjetur akordin me mbrojtësin nga Maqedonia e Veriut, Kitanovski. Verilindorit tashmë kërkojnë të kompletojnë edhe fazën sulmuese.
Skuadra e Kukësit po përgatitet për ndeshjen e turit të parë të Evropa League ndaj Debreçen. Verilindorët kanë nënshkruar me katër futbollistë të cilët pritet të shtojnë cilësinë në skuadër. Të besuarit e trajnerit Ernest Gjoka kanë zyrtarizuar së fundmi edhe një mbrojtës duke kompletuar fazën defensive.
Mbrojtësi nga Maqedonia e Veriut Tome Kitanovski ka gjetur akordin për kalimin tek skuadra e Kukësit. Futbollisti në fjalë është 27-vjeç dhe një siguri e madhe për mbrojtjen e skuadrës shqiptare për shkak të eksperiencës që ka. Kitanovski është pjesë e ekipit kombëtar të vendit fqinj si dhe është aktivizuar në kampionate të ndryshme si Serbia, Rumania, Maqedonia e Veriut, Kroacisë, Azerbajxhani dhe shumë shpejt do të zgjerojë eksperiencën e tij edhe në futbollin shqiptar.
Kitanovski pritet të jetë përforcimi i fundit i skuadrës së Kukësit në fazën mbrojtëse dhe synimi i klubit është përforcimi i fazës sulmuese ku peshon shumë largimi i Rexhinaldos./Abc News Albania 24/7
