Loading ...
Ministria e Jashtme kubane thotë se ka zbuluar një rrjet të trafikut njerëzor që synonte të rekrutonte kubanë për të luftuar për Rusinë në Ukrainë. Ministria theksoi se kubanët që jetonin në Rusi dhe madje disa në Kubë ishin “inkorporuar në forcat ushtarake që merrnin pjesë në luftën në Ukrainë”.
Kuba është një aleat i ngushtë i Rusisë, por ajo theksoi në deklaratën e saj “ajo nuk është pjesë e konfliktit në Ukrainë”. Gushtin e kaluar, presidenti rus Vladimir Putin urdhëroi ushtrinë të rrisë numrin e ushtarëve pasi forcat e saj luftarake pësuan humbje të mëdha nga lufta në Ukrainë.
Gazeta ruse Ryazan Gazette, ka raportuar që atëherë se kubanët që jetonin në Rusi u ishin bashkuar forcave luftarake ruse që luftonin në Ukrainë në këmbim të një premtimi për të marrë nënshtetësinë ruse.
Ndërsa nuk është e qartë nëse deklarata e Ministrisë së Jashtme Kubane është e lidhur me raportet në Gazetën Ryazan, ajo thotë se “Kuba ka një qëndrim të fortë dhe të qartë historik kundër përdorimit të mercenarëve”. Ministria e Jashtme kubane nuk specifikoi se kush qëndron pas operacionit.
“Ne do të veprojmë me vendosmëri kundër atyre që… përfshihen në trafikim njerëzor me qëllim të rekrutimit të qytetarëve kubanë për të mbajtur armë në çdo vend”, thuhet në deklaratë.
Ministri i Jashtëm kuban Bruno Rodríguez publikoi deklaratën në X, i njohur më parë si Twitter, duke shtuar se Kuba po përdor “forcën e ligjit” për të kundërshtuar përpjekjet për të rekrutuar qytetarët e saj./abcnews.al
