Kryeprokurori i Gjykatës Ndërkombëtare Penale, Karim Khan tha në një intervistë për CNN se beson që presidenti rus, Vladimir Putin mund të gjykohet për krime të dyshuara lufte pavarësisht se Moska pretendon se nuk i nënshtrohet vendimeve të gjykatës.
Khan kujtoi gjyqet e kriminelëve nazistë të luftës, të ish-presidentit jugosllav Slobodan Millosheviç dhe ish-udhëheqësit liberian Charles Taylor si shembuj të figurave në dukje të paprekshme që u përballën me drejtësinë. “Ata ishin të gjithë individë të fuqishëm, por u gjendën në sallat e gjyqit,” tha ai.
ICC lëshoi urdhra arresti të premten për Putinin dhe zyrtaren Maria Lvova-Belova. Gjykata tha se Putini “dyshohet se është përgjegjës për krimin e luftës së dëbimit të paligjshëm të fëmijëve dhe atë të transferimit të paligjshëm të tyre nga zonat e pushtuara të Ukrainës në Federatën Ruse”.
Ky veprim ka bërë tashmë histori duke e bërë Putinin kreun e parë të shtetit të një anëtari të përhershëm të Këshillit të Sigurimit të Kombeve të Bashkuara që i është lëshuar një urdhër arresti, vuri në dukje Khan. Krijuar për të gjykuar gjenocidin, krimet kundër njerëzimit dhe krimet e luftës, ICC njihet si “gjykata e fundit në botë”.
Kremlini i cilësoi urdhër-arrestet si “të papranueshme”, duke argumentuar se nuk i nënshtrohet vendimeve të GJNP-së. “Rusia, si një numër shtetesh, nuk e njeh juridiksionin e kësaj gjykate dhe, rrjedhimisht, çdo vendim i këtij lloji është i pavlefshëm për Federatën Ruse nga pikëpamja e ligjit”, shkroi zëdhënësi Dmitry Peskov./abcnews.al
