Kryeministri spanjoll Pedro Sánchez ka vendosur ta bëjë luftën kundër dezinformimit një prioritet për “rinovimin demokratik” të vendit. Opozita konservatore në vend e dënoi menjëherë idenë e tij si një përpjekje për të censuruar mediat kritike ndaj qeverisë. Këtë ide Sanchez e diskutoi këtë të martë, në margjinat e Asamblesë së Përgjithshme të OKB-së, me presidentin brazilian Lula da Silva.
Gjykata e Lartë e Brazilit kohët e fundit urdhëroi bllokimin e rrjetit social X të Elon Musk për moszbatim të urdhrave të gjykatës në lidhje me “lajmet e rreme”.
Qeveria e majtë e Sanchez zbuloi një plan javën e kaluar për të luftuar lajmet e rreme gjatë tre viteve të mbetura të mandatit të tij. Kjo përfshin krijimin e një regjistri publik të gazetave, pronarëve të tyre dhe të ardhurave të tyre nga reklamat. Gjithashtu janë duke u futur masa që duhet të sigurojnë privatësi më të madhe dhe mundësinë e korrigjimit të informacionit të pasaktë.
Sanchez njoftoi në fillim të këtij viti se do të ndërmerrte hapa për të luftuar “fabrikën e mbeturinave” që përhap “dezinformata dhe shpifje”. Lëvizja erdhi pasi një gjykatë hapi një hetim kundër gruas së tij, Begonja Gómez, mbi akuzat për korrupsion dhe tregti të ndikimit të paraqitura nga një grup i lidhur me të djathtën ekstreme. Grupi tha se pretendimet e tij kundër Gomez bazoheshin në raportet e mediave./abcnews.al
