Loading ...
Kryeministri i Groenlandës, Jens-Frederik Nielsen tha se presioni për të marrë përsipër një “vend sovran” është “i papranueshëm” pas njoftimit nga SHBA-të për një të dërguar të posaçëm në territor.
“Amerikanët e dinë se ne i mbështesim. Ata e dinë se nuk ka asnjë pengesë që SHBA-ja të rrisë sigurinë në Arktik në territorin e Groenlandës nëse dëshirojnë ta bëjnë këtë. Por, kalimi nga kjo në presionin për të marrë përsipër një vend që është i populluar dhe ka sovranitetin e vet nuk është i pranueshëm”, tha Nielsen për të përditshmen “Sermitsiaq”.
Duke kujtuar se ambasadori i SHBA-së në Danimarkë, Ken Howery, kishte shprehur mirëkuptimin e Washingtonit gjatë një vizite të kohëve të fundit se Groenlanda nuk dëshiron të bëhet pjesë e SHBA-së, Nielsen tha se Washingtoni po flet hapur me “dy zëra” kur bëhet fjalë për Groenlandën.
“Ajo që po përjetojmë tani është krejt e kundërta e dialogut me ambasadorin, sepse fakti që (presidenti i SHBA-së Donald) Trump nuk na informoi në asnjë mënyrë për emërimin dhe në asnjë mënyrë për qëllimet pas emërimit është komunikim njëkahësh nga ana e Trump. Duhen të paktën dy persona për të zhvilluar një bisedë, dhe kjo nuk ka ndodhur”, shpjegoi ai.
Nielsen vuri në dukje se aleatët duhet të jenë në gjendje t’i besojnë njëri-tjetrit, duke theksuar se shpreson që kjo të jetë e vërtetë në situatën aktuale me SHBA-në.
“Në asnjë moment nuk jemi kontaktuar nga SHBA-ja lidhur me planet për këtë të dërguar të posaçëm. Jam po aq në errësirë sa të gjithë të tjerët lidhur me atë që duhet të bëjë ky person. Por, vërej nga mediat se ai duhet të ndihmojë Trumpin në përpjekjet e tij për të marrë kontrollin e vendit tonë”, tha Nielsen.
Trump njoftoi se Jeff Landry, guvernatori i shtetit amerikan të Luizianës, do të shërbejë si i dërguari special i Washingtonit në Groenlandë. Trump shkroi në platformën e tij “Truth Social” se Landry e njeh “sa thelbësore është Groenlanda” për sigurinë kombëtare të SHBA-së dhe do të përparojë fuqishëm interesat e vendit për të ofruar sigurinë e aleatëve dhe të botës në përgjithësi.
Groenlanda, një territor autonom nën sovranitetin danez, ka tërhequr vëmendjen e SHBA-së për shkak të vendndodhjes së saj strategjike dhe burimeve të mëdha minerale. Trump më parë e përshkroi pronësinë e Groenlandës si “domosdoshmëri absolute” për sigurinë ekonomike të SHBA-së, duke e krahasuar atë me një “marrëveshje të madhe pasurish të paluajtshme”. Si Danimarka ashtu edhe Groenlanda kanë hedhur poshtë çdo propozim për të shitur territorin, duke riafirmuar sovranitetin danez mbi ishullin.
