Loading ...
Kryeministri i Francës, Sebastien Lecornu, ka njoftuar planet për të hequr gradualisht përdorimin e kaldajave me gaz në ndërtimet e reja nga viti 2027, si pjesë e një përpjekjeje më të gjerë për të reduktuar varësinë nga lëndët djegëse fosile dhe për të forcuar sovranitetin energjetik.
Në një fjalim drejtuar kombit, Lecornu tha se “deri në fund të vitit 2026 nuk do të jetë më e mundur instalimi i kaldajave me gaz në ndërtesat e reja”.
Masa vjen në një kohë shqetësimesh të shtuara për sigurinë energjetike pas tensioneve të fundit në Lindjen e Mesme, për të cilat Lecornu tha se tregojnë se si krizat globale ndikojnë drejtpërdrejtë në kostot e jetesës në Francë.
“Sa kohë që varemi nga nafta dhe gazi, do të vazhdojmë të paguajmë çmimin e luftërave të të tjerëve”, tha ai, duke theksuar se politika energjetike duhet të trajtohet si çështje e sigurisë kombëtare dhe jo vetëm si çështje tregu.
Qeveria do të zgjerojë njëkohësisht mbështetjen për alternativat, veçanërisht pompat e nxehtësisë, për të zëvendësuar sistemet e ngrohjes me gaz dhe naftë. Subvencionet publike do të ri-drejtohen për të përshpejtuar elektrifikimin, me synimin për të instaluar deri në 1 milion pompa nxehtësie çdo vit deri në vitin 2030.
Lecornu tha se politika synon të mbrojë familjet nga çmimet e paqëndrueshme të karburanteve dhe njëkohësisht të nxisë industrinë vendase, duke theksuar se energjia elektrike e prodhuar në Francë është më e lirë se lëndët djegëse fosile.
Tranzicioni gjithashtu do të synojë banesat sociale, ku një pjesë e konsiderueshme e shtëpive ende përdorin ngrohje me gaz. Qeveria planifikon të konvertojë 2 milionë njësi banimi sociale nga gazi deri në vitin 2050, duke i dhënë përparësi familjeve në nevojë.
Në mënyrë më të gjerë, Franca synon të zëvendësojë 85 teravat-orë konsum gazi me energji të prodhuar në vend deri në vitin 2030, ekuivalente me importet aktuale të gazit.
Ai e paraqiti këtë ndryshim si pjesë të një agjende më të gjerë ekonomike dhe strategjike, duke lidhur pavarësinë energjetike me sovranitetin kombëtar.
“Elektrifikimi i Francës është një domosdoshmëri si individuale ashtu edhe kolektive”, tha Lecornu, duke shtuar se tranzicioni do të zbatohet përmes planifikimit afatgjatë, duke siguruar që “askush të mos mbetet pas”.
Qeveria po ashtu synon të përshpejtojë përdorimin e automjeteve elektrike, me objektivin që dy nga tre makina të reja të shitura deri në vitin 2030 të jenë elektrike, të mbështetura nga subvencione dhe skema qiraje sociale për familjet me të ardhura më të ulëta.
Lecornu tha se detaje të tjera të reformave do të prezantohen nga ministrat në ditët në vijim.
