Ekipi i tranzicionit i presidentit të sapozgjedhur Donald Trump ka njoftuar se republikani Bryan Lanza nuk po fliste në emër të presidentit kur ai tha se “administrata Trump do t’i kërkonte presidentit ukrainas Volodomyr Zelensky një vizion realist për paqen”.
Lanza tha se prioriteti i administratës së re në Ukrainë do të jetë vendosja e paqes dhe jo rivendosja e territorit të humbur, përfshirë Krimenë, shkruan Reuters.
“Dhe nëse presidenti Zelensky vjen në tryezë dhe thotë, ne mund të kemi paqe vetëm nëse kemi Krimenë, ai na tregon se ai nuk është serioz. Krimea është zhdukur”, tha Lanza.
Duke iu përgjigjur komenteve të tij, një zëdhënës i ekipit të Trump mohoi që Lanza të ketë folur në emër të presidentit.
“Bryan Lanza ishte një kontraktor për fushatën”, tha zëdhënësi.
“Ai nuk punon për presidentin Trump dhe nuk flet për të”, shtoi ai.
