Ambasadori i Prezencës së OSBE-së në Shqipëri, Vincenzo Del Monaco paraditen e sotme zhvilloi një takim me kryetarin e Gjykatës së Shkallës së Parë për Korrupsionin dhe Krimin e Organizuar Sandër Simoni, i cili ndër të tjera i paraqiti shqetësimet e gjyqtarëve.
“Kryetari Sandër Simoni e informoi Ambasadorin Del Monaco mbi përfundimin e gjykimit të disa çështjeve për vepra penale në kuadër të grupit të strukturuar kriminal, si dhe ngarkesën e gjyqtarëve me kërkesa gjatë fazës së hetimit paraprak dhe ato për sekuestro e konfiskim në kuadër të Aktit Normativ nr. 1 datë 31.01.2020 duke theksuar se pas çdo përfundimi me sukses të procedime penale të nisura nga SPAK, janë vendimet e gjyqtarëve të Gjykatës së Posaçme, qoftë si gjyqtar të hetimeve paraprake, të seancës paraprake apo si gjyqtarë të gjykimit të çështjeve” thuhet në njoftimin e shpërndarë për mediat.
Akti Normativ nr. 1 datë 31.01.2020 bën fjalë për Operacionin Forca e Ligjit, afati i të cilit përfundoi në 31 dhjetor të vitit që u mbyll, ndërsa në proces janë vetëm çështjet që janë referuar, pasi formularë për justifikimin e pasurisë nuk dërgohen më për subjektet.
Në njoftim theksohet gjithashtu se ambasadori Del Monaco shprehu interesimin mbi kompetencat e gjykatës në mbikqyrjen e mirëadministrimit të pasurive të përftuara nga veprimtaria kriminale e që janë sekuestruar me vendim të Gjykatës së Posaçme, si dhe objektin e mundshme të gjykatës lidhur me veprimtarinë kriminale të grupeve kriminale për trafikimin e kontrabandimin e paligjshëm të emigrantëve nga Lindja e Mesme apo atë të rekrutimit të elementëve me prirje ekstremiste apo terroriste./ db/ Abcnews.al
