Vjen një moment kur forca dhe motivimet bien, trupi nuk është më i njëjti dhe tërheqja nga futbolli është zgjidhja e vetme. Aq më tepër kur ke fituar gjithçka të mundur dhe ke shënuar gola pafund si David Villa.
Sulmuesi spanjoll mbush 38 vjeç me datë 3 dhjetor dhe aktualisht është pjesë e Vissel Kobe. Ky sezon i kampionatit japonez përfundon pas tre javësh, teksa Villa ka bërë publik vendimin e tërheqjes në një konferencë për shtyp.
“Kam dashur gjithmonë që të lë unë futbollin dhe jo futbolli mua. E mendoj prej vitesh tërheqjen. Vjen një moshë kur duhet ta marrësh vendimin. Koha kalon dhe trupi fillon të të paralajmërojë. Jam i lumtur dhe krenar me karrierën që kam zhvilluar. Do të tërhiqem me datë 2 janar, kur të fitojmë Emperors Cup në Tokio“, përfundon Villa.
Sulmuesi i njohur e nisi karrierën te Sporting Gijon. Më pas erdhën aventurat me Real Zaragozën, Valencian, Barcelonën, Atletico Madrid, New York City, Melbourne City dhe Vissel Kobe. 37-vjeçari shënoi 59 gola me Spanjën, teksa përveç shumë trofeve të fituar me klubet, ia doli të shpallej kampion Evropë dhe Bote me kombëtaren iberike. /abcnews.al
