Trajneri i Benfikës, Jorge Jesus, ka bërë një krahasim të yjeve të sotshëm të futbollit me Diego Armando Maradonën. 66-vjeçari mendon se lojtari i vetëm që ka disa cilësi të argjentinasit është Cristiano Ronaldo, ndërsa Messi nuk i afrohet fare.
“Sot në dy lojtarët më të mirë që bota ka, Cristiano Ronaldo ka pak nga ato cilësi që Maradona kishte. Messi nuk ka asgjë. Ai nuk ka pasionin që Diego kishte për lojën. Leo është një lojtar i shkëlqyer, por ne po flasim për jetën, ndjenjat, pasionin për lojën dhe futbollin. Mendoj se Maradona ishte mbi të gjithë në atë drejtim”, deklaron portugezi.
“Maradona ishte lojtari më i mirë që futbolli ka patur, së bashku me Pele. Fatmirësisht, Pele është ende gjallë. Diego ishte më i miri, jo vetëm se ishte një gjeni, por për shkak të stilit të tij. Kjo bën shumë ndryshim për mua.
Ai lindi për të qenë një futbollist, kishte pasionin për lojën. Nuk kapi majat falë punës, por nga talenti i tij. Maradona absolutisht ishte një lojtar i klasit botëror dhe padyshim që do t’i rezistojë kohës”, përfundon Jesus. /abcnews.al
