Kovashica, një fshat i vogël në afërsi të lumit Drini i Zi, është një nga fshatrat më të lashta dhe më të pasura me histori dhe tradita të Maqellarës. Sipas gojdhënave, Kovashica ka qenë dikur një qendër tregtare dhe zejtarie, ku udhëtarët e largët dhe karvanet kalonin për nevojat e tyre. Fshati ishte i njohur për zejtarët e tij, ndër të cilët kovaçët, nallbanët dhe farkëtarët luanin një rol kyç. Ata jo vetëm që shërbenin për komunitetin, por gjithashtu ishin një pjesë e rëndësishme e rrjetit të furnizimit për fshatrat e tjerë dhe udhëtarët që kalonin rrugët e vjetra nacionale.
Sipas rrëfimeve të banorëve më të parë të këtij fshati, rrënjët e disa prej familjeve të Kovashicës shtrihen më shumë se 700 vjet më parë, kur disa familje nga Struga dhe Ohri, të dëbuar nga pushtimi turk, gjetën strehim në këtë fshat. Pas një periudhe të vështirë dhe migrimesh nëpër zona të tjera, ata u vendosën në Kovashicë, ku gjetën mundësinë për një jetë më të mirë falë tokave të pasura, ujit dhe pyjeve të mrekullueshme.
Kovashica është gjithashtu një vend ku ka një traditë të fortë mikpritjeje dhe harmoni mes banorëve.
Një nga figurat më të njohura të fshatit është Setki Jashari, i cili ka lindur dhe ka kaluar pjesën më të madhe të jetës në Kovashicë. Edhe pse Setkiu u largua nga fshati dhe kaloi një periudhë të gjatë në emigrim, ai kurrë nuk e ka braktisur vendlindjen e tij. Setkiu ka pasur një jetë të mbushur me sfida, përfshirë kohën që ka kaluar në spital dhe torturat e regjimit të asaj kohe, por gjithmonë ka mbajtur gjallë dashurinë për muzikën klasike dhe artin. Ai është një poet dhe shkrimtar i njohur.
Me mundësi të jashtëzakonshme për zhvillim turistik dhe një kulturë të pasur, Kovashica mbetet një simbol i punës, mikpritjes dhe unitetit mes njerëzve./abcnews.al
