Loading ...
Autoritetet në Kosovë kanë bllokuar në treg qumështin për foshnje ‘Beba Suprem Pre’ 800 gram, pas njoftimit te marre nga Autoriteti Kombëtar i ushqimit në Shqipëri. Nuk dihet nëse ky lloj qumështi është në shitje dhe në Shqipëri dhe si po veprohet në tregun tonë, ndërsa AKU nuk i dha ABC News një përgjigje pas interesimit tonë. Disa ditë më parë ky institucion njoftoi tërheqjen nga tregu në Shqipëri të qumështit për bebe “Aptamil 1 pronutra”, për shkak të përmbajtjes së rrezikshme për shëndetin.
Agjencia e Ushqimit dhe Veterinarisë në Kosovë ka bllokuar qumështin për foshnje Beba Suprem Pre 800 gram me datë skadence majin e vitit 2027.
Autoritetet në Kosovë nuk shpjegojnë arsyet e këtij bllokimi, por përmes një njoftimi për shtyp thonë se këtë masë e kanë marrë pas njoftimit nga Autoriteti Kombëtar i Ushqimit në Shqipëri se subjekti “Rossmann & LALA” ka eksportuar këtë produkt ushqimor për fëmijë edhe atje.
Në Kosovë qumështi për bebe sipas Agjencisë së Ushqimit dhe Veterinarisë do të asgjësohet. Ndërkohë në Shqipëri ende nuk dihet nëse ky qumësht është tërhequr nga tregu apo po vijon të tregtohet.
ABC News pyeti pranë ministrisë së Bujqësisë, por deri në momentin e publikimit të kësaj kronike nuk mori përgjigje. Autoriteti Kombëtar i Ushqimit javën e shkuar bllokoi qumështin për bebe “aptamil 1 pronutra” me paketim 800 gramë dhe datë skadence nëntorin e vitit 2026 dhe më herët atë “nan 1 optipro” 800g.
Kjo pas njoftimit nga autorietet europiane se në produkt ishe gjetur substanca cereulide , një toksinë e prodhuar nga bakteri ‘bacillus cereus’. Sipas specialistëve ajo shkakton diarre, dhembje barku ndonjëherë dhe ethe të lehta 8 deri në 16 orë pas konsumimit./abcnews.al
