Koreja e Veriut ka lëshuar dy raketa balistike me rreze të shkurtër veprimi nga zona e Phenianit në drejtim të bregut lindor të vendit, sipas zyrtarëve koreano-jugorë dhe japonezë, duke shënuar testimin e katërt të raketave të Phenianit në një javë.
Televizioni kombëtar japonez NHK tha se raketa të shumta u lëshuan nga Koreja e Veriut të shtunën në mëngjes dhe besohet se kishin rënë në Detin e Japonisë, megjithëse jashtë zonës ekskluzive ekonomike të Japonisë.
“Ajo që duket të jetë një raketë balistike u lëshua nga Koreja e Veriut,” tha roja bregdetare japoneze në një deklaratë të dhënë në orën 6:47 (21:47 GMT) me orën lokale të shtunën.
Në një deklaratë të dytë të dhënë rreth 15 minuta më vonë, roja bregdetare tha se një tjetër raketë balistike ishte lëshuar.
NHK tha se predhat dukej se kishin rënë jashtë zonave ekskluzive ekonomike të Japonisë, duke cituar burime qeveritare.
Zyra e kryeministrit të Japonisë Fumio Kishida shkroi në Twitter se lëshimi i fundit i raketës po analizohej dhe po jepeshin udhëzime për sigurinë e njerëzve, avionëve dhe anijeve.
Koreja e Veriut lëshoi raketa balistike me rreze të shkurtër veprimi në det të mërkurën dhe të enjten në orët para dhe pas një vizite të Zëvendës Presidentes së SHBA Kamala Harris në Korenë e Jugut gjatë së cilës ajo theksoi angazhimin “e hekurt” të Shteteve të Bashkuara për sigurinë e aleatëve të saj aziatikë.
Nisja e fundit vjen gjithashtu pasi marina e Koresë së Jugut, SHBA-së dhe Japonisë organizuan stërvitje trepalëshe anti-nëndetëse të premten për herë të parë në pesë vjet.
