Prej disa kohësh “Bardhezinjtë” e Juventus janë në kërkim të një mesfushori për të përforcuar organikën për sezonin e ardhshëm dhe emri i piketuar nga”Zonja e Vjetër” është ai i “tulipani’ holandez, Teun Koopmeiners, i cili po shkëlqen te prej disa sezonesh tashmë te “Bergamaskët” e Atalanta, mirëpo këta të fundit nuk pranojnë më pak se 60 milionë euro për kartonin e tij.
Kjo shifër ka stepur jo pak rekordmenët e Italisë, me bordin që shpreson ende se “Zikaltërit” do të ulin pretendimet, por në të njëjtën kohë kanë nisur të studiojnë tregun për të pasur edhe një plan B apo një plan C, kështu dy emra të tjerë që Giuntoli po mban nën vëzhgim janë Mateo Guendozi i Lazio dhe Lazar Samardzic i Udinese.
Për të parin Lazio mund të pranojë të heqë dorë nëse vjen një ofertë prej 30 milionë eurosh, duke qenë se e bleu vetëm një vit më parë nga Marseille për 18 milionë euro, ndërsa nga ana tjetër Udinese kërkon minimalisht 25 milionë euro për Samardzic, por serbi është ende i ri dhe nuk ofron shumë garanci.
Ndërkohë, trajneri i ardhshëm i bardhezinjve, Thiago Motta, mësohet se ka pasur një telefonatë me francezit Adrien Rabiot, të cilin ka provuar ta bindë që të firmosë zgjatjen e kontratës me Juventus, kjo pasi dyshja kanë qenë shok skuadra te PSG-ja, disa sezone më parë dhe tekniku i ri i Juventus kërkon të punojë sërish me francezin. /i.m /abcnews.al
