Presidenti kolumbian, Gustavo Petro njoftoi të shtunën se vendi i tij do të pezullojë eksportet e qymyrit në Izrael për shkak të luftës në Gaza. Marrëdhëniet janë acaruar mes dy vendeve që dikur ishin aleatë të ngushtë ushtarakë dhe tregtarë, raporton AP.
Petro ka shkruar në platformën e mediave sociale X se eksportet e qymyrit do të rifillojnë vetëm “kur të ndalojë gjenocidi” në Gaza.
Petro postoi gjithashtu një projekt-dekret, i cili thotë se eksportet e qymyrit do të rifillojnë vetëm nëse Izraeli zbaton një urdhër të fundit nga Gjykata Ndërkombëtare e Drejtësisë që thotë se Izraeli duhet të tërheqë trupat e tij nga Rripi i Gazës.
Izraeli importon më shumë se 50% të qymyrit të tij nga Kolumbia, sipas American Journal for Transportation, dhe e përdor pjesën më të madhe të tij për të ushqyer termocentralet që ka.
Petro, i cili e mori detyrën në vitin 2022 si presidenti i parë majtist i Kolumbisë, prishi marrëdhëniet diplomatike me Izraelin në maj, duke thënë se ai nuk mund të mbante marrëdhënie me qeverinë “gjenocidale” të kryeministrit Benjamin Netanyahu.
