Tre persona janë arrestuar nga policia pasi akuzohen për kultivim të lëndëve narkotike. Në pranga janë vënë E. Y., 37 vjeç dhe Xh. T., 27 vjeç të cilët në një banesë të braktisur kultivonin fidanë kanabisi. Uniformat blu bëjnë me dije se është arrestuar edhe G. Y., 21 vjeç, banues në Kreshpan i cili ka ndihmuar njërin prej tyre të arratiset me makinën e tij, në momentin kur janë pikasur nga policia.
Në lidhje me këtë çështje materialet do t’i kalojnë Prokurorisë pranë Gjykatës së Shkallës së Parë Fier, ndërkohë që ndaj tre të arrestuarve rëndojnë akuzat për veprat penale “Kultivimi i bimëve narkotike” dhe “Përkrahja e autorit të krimit”.
“Policia godet një tjetër rast të tentativës për kultivim të bimëve narkotike. Bien në prangat e Policisë 3 shtetas, njëri prej tyre i shpallur në kërkim për “Prodhim dhe shitje të lëndëve narkotike”.
Nga specialistët për Hetimin e Krimeve në Komisariatin e Policisë Fier u arrestuan në flagrancë, për veprën penale “Kultivimi i bimëve narkotike”, shtetasit E. Y., 37 vjeç (i shpallur në kërkim, me masë sigurie “Arrest në burg” të caktuar nga Gjykata për veprën penale “Prodhimi dhe shitja e lëndëve narkotike”) dhe Xh. T., 27 vjeç, të dy banues në Fier, pasi në një banesë të braktisur në fshatin Kreshpan, janë kapur nga shërbimet e Policisë, duke kultivuar në kubikë fidanë cannabis sativa.
Gjithashtu, për këtë rast u arrestua për veprën penale “Përkrahja e autorit të krimit”, shtetasi G. Y., 21 vjeç, banues në Kreshpan, i cili gjatë momentit që autorët janë pikasur nga shërbimet e Policisë, ka ndihmuar shtetasin Xh. T. të largohej nga vendi i ngjarjes me automjetin e tij. Materialet do t’i kalojnë Prokurorisë pranë Gjykatës së Shkallës së Parë Fier, për veprime të mëtejshme procedurale”, njofton policia. /mv.abcnews.al
