Shpesh ndodh që ju të ndiheni të trishtuar pasi askush nuk po ju punëson, edhe pse keni aplikuar thuajse kudo. Ndoshta referencat tuaja në CV janë perfekte, por ju ende nuk po përzgjidheni për tu intervistuar.
Por kush janë disa nga shkaqet se përse ju nuk po punësoheni? Më poshtë ju radhisim arsyet që mund të kenë ndikuar në mospunësimin tuaj.
Së pari, ju ndoshta keni aplikuar jo në punën e duhur!
Ju duhet të kuptoni mjaft mirë aftësitë tuaja dhe të pyesni veten se çfarë dëshironi në karrierën tuaj.
Duke identifikuar dy pikat kyçe të sipërpërmendura, atëherë ju do të jeni të qartë të kuptoni se kush është puna perfekte për ju.
Një tjetër pikë kyçe është edhe CV-ja juaj. Ndonjëherë CV-ja juaj nuk përmbush kërkesat që janë paraqitur për aplikimin e një vendi pune.
Shpesh na ndodh të bëjmë një gabim të dukshëm, që është pikërisht dërgimi i të njëjtës CV në të gjitha vendet e punës. E mira është që në të, të shkruhen aftësitë tuaja të cilat kanë lidhje me punën që po aplikoni.
Pyetjet e intervistës janë një tjetër pikë mjaft e rëndësishme.
Mund t’ju ndodhë që të mos shfaqni besim teksa ju po intervistoheni. Jo vetëm kaq por ju ndoshta nuk po i përgjigjeni në mënyrë të duhur pyetjeve që po ju bëhen.
Largoni emocionet dhe jepni maksimumin!
