Olympe de Gouges (1748-1793) ishte një aktiviste e shquar franceze që mbështeti të drejtat e grave përpara se të ekzekutohej me gijotinë gjatë Revolucionit Francez.
Vepra e saj më e famshme ishte Deklarata e të Drejtave të Gruas e botuar në 1791. Duke botuar këtë dokument, de Gouges shpresonte të ekspozonte dështimet e Revolucionit Francez në njohjen e barazisë së gjinive.
Deklarata e Gouges, e modeluar sipas “Deklaratës së të Drejtave të Njeriut dhe Qytetarit” të Asamblesë Kombëtare të vitit 1789, i bëri jehonë të njëjtës gjuhë dhe e shtriu atë tek gratë. Shkrimet e saj nuk u vlerësuan nga udhëheqësit e revolucionit. Pierre Gaspard Chaumette, President i Komunës së Parisit, e kritikoi atë se kishte “harruar virtytet që i përkasin seksit të saj”.
Olympe, pasi iu mohua zëri në organizatat vendimmarrëse të kohës së saj, shkroi pamflete dhe postera të cilat i shpërndau në të gjithë Parisin. Ajo luftoi kundër padrejtësisë dhe pabarazisë ndërsa shkruante kundër skllavërisë dhe dënimit me vdekje dhe ëndërronte për një shoqëri më të barabartë ku gratë do të kishin role vendimmarrëse. Ajo propozoi gjithashtu taksimin e të pasurve, gjykimin nga juria dhe ligje të arsyeshme divorci për të mbrojtur gratë dhe fëmijët nga varfëria. Përveç pamfleteve dhe eseve të saj, ajo shkroi drama me tema bashkëkohore.
Edhe në një kohë revolucioni, idetë e saj feministe konsideroheshin radikale dhe të rrezikshme. Në vitin 1793, autorja e 40 dramave dhe e mbi 70 broshurave politike u vu në skelë dhe u ekzekutua për shkrimet e saj politike./abcnews.al
