Ditën e sotme organizohet Asambleja e Real Madrid dhe pjesë e saj është edhe presidenti Florentino Perez. Klubet e mëdha europiane kanë në projeksionin e tyre organizimin e një Superligë Europiane, në të cilën do të luajnë klubet më të mëdha dhe historikë dhe finalet e së cilës do të jenë në formën e final-four, siç ndodh në NBA.
Megjithëse nuk e përmend asnjëherë këtë kompeticion madhor, Perez tregon qartë se është pro këtij ndryshimi gjigant dhe bën thirrje se duhet të ndodhë sa më shpejt. Ky kompeticion do të sillte të ardhura të frikshme për klubet e mëdha. Perez prek pak edhe problemin e kalendarit të ngjeshur.
“Futbolli ka nevojë për formula që e bëjnë atë më konkurrues dhe emocionues. Real Madrid ka marrë pjesë në të gjitha risitë në sportin tonë. Ne ishim themeluesi i vetëm i FIFA në vitin 1904, së bashku me shtatë Federata.
Në vitin 1955 L’Equip dhe Real Madrid promovuan krijimin e Kupës së Evropës, një moment revolucionar, që ndryshoi historinë e futbollit. Pa këto ndryshime futbolli nuk do të ishte ky që është sot, por kemi nevojë për një ndryshim të ri.
Futbolli duhet të përballet me këto kohë të reja. Lojtarët dhe vetë tifozët përballen me një ngjeshje të kalendarit, që e bën gjithçka më të vështirë, madje edhe identifikimin e konkurrencës.
Ka lojtarë që janë dëmtuar shumë nga kjo ngjeshje. Reforma në futboll nuk mund të presë dhe duhet të ndodhë. Ne kemi një përgjegjësi të luftojmë për këtë ndryshim që pandemia ka sjellë te ne”, u shpreh Perez. /abcnews.al
