Kategoria e Dytë vijon garimin dhe në grupin A ka një duel mes Vorës dhe Luzit 2008. Skuadra periferike e kryeqytetit vijon të fitojë dhe këtë herë ia ka dalë me Vllazninë B, me rezultatin e pastër 0-2. Kavajasit janë kundërpërgjigjur me nëj triumf të thellë kundër Mirditës, me shifrat 5-1.
Fitore edhe për Sopotin e vendit të katërt, që mposhti Internacional Tiranën. 2-4 u mbyll kjo përballje, ndërkohë që sot u luajt edhe Ada-Tirana B. Ekipi nga Velipoja triumfoi 2-1 kundër bardhebluve. Tre pikëve iu gëzuar edhe skuadra e Spartakut, që likuidoi Klosin.
Fitojnë sot edhe skuadrat e kreut në grupin B. Tomori i vendit të parë i shënoi tetë gola Selenicës, që në Berat realizoi vetëm një gol nderi. Maliqit i ka mjaftuar një gol kundër Memaliajt për të marrë pikët e plotë, ndërkohë që nuk ka gabuar edhe Albpetroli.
Skuadra nga Patosi ia doli mbanë në Këlcyrë, me shifrat 3-4. Në këtë grup vetëm një ndeshje u mbyll në barazim, Naftëtari-Tepelena, që u mbyll 1-1. Fitore për Delvinën, që në transfertë ia doli të thyente skuadrën e Skraparit. /abcnews.al
