Një ditë ndryshe te Tirana, që ka mirëpritur fëmijët e komunitetit rom. E gjitha bëhet në kuadër të lëvizjes kundër diskriminimit dhe pabarazisë, në sport dhe në çdo fushë tjetër. Klubi bardheblu ka bashkëpunuar me organizatën Farenet në këtë aktivitet.
Në të kanë marrë pjesë edhe dy futbollistë të bardhebluve, Kristi Vangjeli dhe Michael Ngo. “Është e rëndësishme të promovojmë vlera të njëjta, barazi dhe gjithëpërfshirje sociale, sidomos përmes sportit. Te KF Tirana ne qëndrojmë të bashkuar si një skuadër, si një familje, pavarësisht dallimeve tona”, tha korçari.
Më pas e mori fjalën sulmuesi: “Diskriminimi nuk është i duhuri. Nuk është fitimprurës dhe nuk e ndihmon brezin e ardhshëm. Është e rëndësishme që fëmijët të rriten të fortë, të shmangin diskriminimin dhe ta luftojnë atë për të arritur qëllimet e tyre. Jam i kënaqur që sistemi gjithëpërfshirës që klubi po përdor, u jep mundësinë këtyre fëmijëve të përjetojnë këto moment. Është bekim, jam vërtetë i lumtur”. /abcnews.al
