Humbja ndaj Lyon e befasoi Juventusin. Francezët fituan 1-0 në shtëpinë e tyre dhe shkojnë në Torino me besim për të tentuar eliminimin e bardhezinjve të Sarrit, objektiv shumë i vështirë për t’u realizuar.
Kampionët e Italisë kanë besim te përmbysja në Torino (luhet me 17 mars) dhe fjalën e ka marrë Cristiano Ronaldo. Ylli portugez është i zemëruar për humbjen, por beson fort te kualifikimi në çerekfinale në një prononcim për Sky Sport.
“Një humbje e tillë mund të ndodhë, të gjithë rivalët janë të fortë në Champions League. Sigurisht që nuk jemi të kënaqur, jemi të zemëruar, por është edhe ndeshja e kthimit në fushën tonë. Kemi shumë besim te përmbysja dhe kualifikimi.
Prioriteti momental është të fitojmë ndeshjet e radhës në kampionat, më pas do të mendojmë për Champions. Jemi të qetë, të përqendruar dhe gati për betejat e radhës. Nuk kemi frikë nga eliminimi. Champions është kompeticioni më i vështirë në futboll, nuk ka asnjë ndeshje të lehtë.
Ne do të luajmë në stadiumin tonë ndeshjen e kthimit, përpara tifozëve tanë. Kemi besim, në futboll mund të ndodhë gjithçka. Na vjen keq për humbjen në Francë, por mezi po pres ndeshjen e kthimit. Jam i bindur që do të kualifikohemi“, përfundon CR7. /abcnews.al
