Ushtria izraelite tha se do të vazhdojë të godasë objektivat e Hezbollahut në Bejrut, luginën Bekaa dhe Libanin jugor.
Herzi Halevi, shefi i Shtabit të Përgjithshëm të Forcave të Mbrojtjes të Izraelit, deklaroi në një video-mesazh të enjten se ushtria është “e vendosur të shkatërrojë” infrastrukturën e Hezbollahut pranë kufirit libanez dhe do të vazhdojë të shkaktojë dëme kundër grupit militant, shkruan CNN.
Halevi tha se kthimi i banorëve pranë kufirit në shtëpitë e tyre “do të thotë shkatërrim i infrastrukturës terroriste që Hezbollahu ka ndërtuar pranë kufirit, në mënyrë që ata të mund të bastisin komunitetet tona dhe të vrasin civilët izraelitë kur të jepet urdhri”.
“Ne jemi shumë të vendosur të shkatërrojmë këtë infrastrukturë dhe të eliminojmë këdo që është i pranishëm atje. Ne nuk do të lejojmë që Hezbollahu të vendoset në këto vende”, tha shefi ushtarak.
Izraeli e ka akuzuar Hezbollahun për vendosjen e objekteve të armëve nën ndërtesat e banimit në Bejrut, ndërkohë që liderët politikë izraelitë janë bërë gjithnjë e më sfidues ndaj thirrjeve ndërkombëtare për përmbajtje dhe zemërim lidhur me rritjen e viktimave civile në Liban dhe Gaza./abcnews.al
