Loading ...
Italia do t’i vendosë të gjitha 27 qytetet e saj kryesore, duke nisur nga Trieste në veri deri në Palermo në jug, në nivelin më të lartë të alarmit për të nxehtin, ndërsa vala e katërt e të nxehtit që godet vendin këtë verë po intensifikohet.
Alarmi i kuq nënkupton një rrezik të shtuar për shëndetin e të gjithë popullsisë për shkak të temperaturave ekstreme dhe të zgjatura, duke rritur mundësinë e situatave emergjente.
Ministria italiane e Shëndetësisë ka njoftuar se 25 qytete ishin nën alarm të kuq të mërkurën, ndërsa dy të tjera do t’i shtohen listës të enjten. Kjo është hera e parë këtë vit që të 27 qytetet e monitoruara nga sistemi i mbikëqyrjes së valëve të të nxehtit i ministrisë vendosen në nivelin maksimal të alarmit.
Ndërsa temperaturat në disa zona të Italisë janë afruar pranë 40 gradë celsius ditët e fundit, autoritetet u kanë bërë thirrje qytetarëve të shmangin ekspozimin e drejtpërdrejtë në diell nga ora 11:00 deri në 18:00, të qëndrojnë brenda sa herë që është e mundur dhe të konsumojnë të paktën 1.5 litra ujë në ditë.
Udhëzimet e tjera përfshijnë shmangien e pijeve të gazuara, kafesë, alkoolit dhe vakteve të rënda, veshjen me rroba të lehta dhe moslënien kurrë të fëmijëve ose kafshëve brenda automjeteve.
Sipas shkencëtarëve, kjo valë ekstreme e të nxehtit, e nxitur nga ndryshimet klimatike të shkaktuara nga aktiviteti njerëzor, nuk pritet të zbutet për të paktën edhe një javë.
Evropa është ngrohur rreth dy herë më shpejt se mesatarja globale.
