Irani ka lëshuar me sukses një sateltit, i fundit për një program që Perëndimi ka frikë se përmirëson raketat balistike të Teheranit. Njoftimi vjen pas rritjes së tensioneve në Lindjen e Mesme dhe vetëm disa ditë pasi Irani dhe Pakistani sulmuan njeri-tjetrin.
Sateliti Sorayya, i cili i përket Agjencisë Hapësinore të Iranit, “u lëshua sot me sukses nga raketa Ghaem-100 e Gardës Revolucionare”.Ai u vendos në një orbitë 750 kilometra mbi Tokë, kjo është hera e parë që Irani lëshon një satelit mbi 500 kilometra, sipas agjencisë zyrtare të lajmeve të Iranit Irna.
Ministri i Telekomunikacionit Isa Zarepour tha se Sorayya është “një satelit kërkimor që peshon rreth 50 kilogramë”.
Irani ka zhvilluar prej vitesh aktivitetet e tij në hapësirë, duke theksuar se janë në përputhje me një rezolutë të Këshillit të Sigurimit të OKB-së. Por qeveritë perëndimore kanë frikë se sistemet e saj të lëshimit satelitor përfshijnë teknologji që mund të ndërrohen me ato të përdorura në raketat balistike të afta për të mbajtur një kokë bërthamore.
Raketa Ghaem-100 u zhvillua nga Garda Revolucionare, ushtria ideologjike e Republikës Islamike, e cila njoftoi në shtator se kishte lëshuar satelitin Nour-3.
Republika Islamike e Iranit ka qenë subjekt i sanksioneve të ashpra të SHBA-së që kur Uashingtoni u tërhoq në 2018 nga një marrëveshje ndërkombëtare që synonte të kufizonte aktivitetet bërthamore të Iranit në këmbim të heqjes së sanksioneve ndërkombëtare.
/abcnews.al
