Suedia dhe Irani kanë shkëmbyer të burgosur të shtunën, thanë zyrtarët, me Suedinë që e liroi një ish-zyrtar iranian të dënuar për rolin e tij në ekzekutimin masiv të të burgosurve politikë më 1988, derisa Irani i liroi dy suedezë që po mbaheshin nga Teherani.
Hamid Nouri u lirua nga Suedia në shkëmbim të lirimit të një diplomati të Bashkimit Evropian dhe të një burri tjetër të mbajtur nga Teherani.
Irani i liroi Johan Floderus, një suedez që punonte për trupin diplomatik të BE-së, si dhe Saeed Azizin, tha kryeministri i Suedisë, Ulf Kristersson.
“Ata janë në avion rrugës për në Suedi, dhe së shpejti do të ribashkohen me familjet e tyre”, tha Kristersson në rrjetin social X.
Omani e ndërmjetësoi marrëveshjen e shkëmbimit, raportoi agjencia shtetërore e lajmeve e Omanit.
Televizioni shtetëror iranian raportoi se Nouri është liruar tashmë dhe se do të kthehet në Teheran.
Në vitin 2022, Gjykata e Qarkut e Stokholmit e dënoi Nourin me burgim të përjetshëm për shkak të rolit të tij në ekzekutimet masive. Gjykata e identifikoi atë si ndihmës të zëvendësprokurorit në burgun Gohardasht në periferi të qytetit iranian Karaj.
Ekzekutimet masive të vitit 1988 u kryen në fund të luftës së gjatë të Iranit me Irakun. Pasi lideri suprem i atëhershëm i Iranit, Ruhollah Khomeini, e pranoi një marrëveshje të ndërmjetësuar nga Kombet e Bashkuara për armëpushim, pjesëtarët e grupit opozitar iranian, Mujahedeen-e-Khalq, të armatosur rëndë nga Saddam Hussein, kryen një sulm befasues përgjatë kufirit iranian.
Irani e frenoi sulmin e tyre, por sulmi u hapi rrugë rigjykimeve të rrejshme të burgosurve politikë, militantëve dhe të tjerëve, që më vonë u bënë të njohura si “komisionet e vdekjes”.
Grupet ndërkombëtare për të drejtat e njeriut vlerësojnë se rreth 5.000 njerëz u ekzekutuan. Irani kurrë nuk i ka pranuar plotësisht ekzekutimet, të cilat u kryen me urdhrat e Khomeinit, edhe pse disa argumentojnë se edhe zyrtarët e tjerë të lartë ishin përgjegjës në muajt e fundit para vdekjes së Khomeinit më 1989.
Presidenti i ndjerë iranian Ebrahim Raisi, i cili vdiq nga rrëzimi i një helikopteri në maj, ishte përfshirë gjithashtu në ekzekutimet masive./REL
