Loading ...
Irani i ka dërguar SHBA propozimin e tij të fundit për t’i dhënë fund luftës nëpërmjet ndërmjetësve pakistanezë.
Shtëpia e Bardhë ka thënë se nuk do të komentojë mbi propozimin e ri të Iranit, shkruan Sky News.
“Ne nuk japim detaje për bisedat private diplomatike”, tha zëdhënësja Anna Kelly.
“Presidenti Trump ka qenë i qartë se Irani nuk mund të ketë kurrë një armë bërthamore dhe negociatat vazhdojnë për të siguruar sigurinë kombëtare afatshkurtër dhe afatgjatë të Shteteve të Bashkuara.”, shtoi ajo.
Të dy vendet arritën një marrëveshje për një armëpushim më 8 prill, por bisedimet kanë qenë në proces për të arritur një marrëveshje për një paqe më të përhershme.
Ndërkaq, administrata amerikane argumentoi se lufta në Iran tashmë ka përfunduar për shkak të armëpushimit që filloi në fillim të prillit, një interpretim që do t’i lejonte Shtëpisë së Bardhë të shmangte nevojën për të kërkuar miratim nga Kongresi.
Deklarata forcon një argument të paraqitur nga Sekretari i Mbrojtjes Pete Hegseth gjatë dëshmisë në Senat të enjten, kur ai tha se armëpushimi e ka ndalur efektivisht luftën.
Sipas këtij arsyetimi, administrata nuk e ka përmbushur ende kërkesën e përcaktuar nga një ligj i vitit 1973 për të kërkuar miratim formal nga Kongresi për veprime ushtarake që zgjasin më shumë se 60 ditë.
Një zyrtar i lartë i administratës, i cili foli në kushte anonimiteti për të diskutuar qëndrimin e administratës, tha se për shkak të atij ligji, “luftimet që filluan të shtunën, më 28 shkurt, kanë përfunduar”. Zyrtari tha se ushtria amerikane dhe Irani nuk kanë shkëmbyer zjarr që nga armëpushimi dyjavor që filloi më 7 prill./abcnews.al
