Loading ...Ushqimi nuk është thjesht kalori, është informacion për organizmin dhe mënyrën se si ai funksionon.
Dietologia klinike dhe nutricionistja Blerina Bombaj shpjegon se insulinorezistenca lidhet ngushtë me mënyrën e ushqyerjes, aktivitetin fizik dhe shpërndarjen e dhjamit në trup.
Konsumimi i shpeshtë i ushqimeve të përpunuara dhe i produkteve me shumë sheqerna mund të favorizojë shtimin e dhjamit në mëlçi dhe përkeqësimin e ndjeshmërisë ndaj insulinës.
Kur qelizat nuk i përgjigjen mirë insulinës, pankreasi kompenson duke prodhuar më shumë dhe kështu krijohet një cikël që mund të çojë drejt problemeve metabolike.
Por a është çdo dietë njësoj për të gjithë? Bombaj këmbëngul te ushqyerja e personalizuar dhe te reduktimi i dhjamit visceral, aktiviteti fizik dhe zgjedhjet e duhura ushqimore.
Një tjetër debat është ai mes gjalpit dhe djathit: cili duhet konsumuar më me kujdes?
Gjalpi është pothuajse tërësisht yndyrë, ndërsa djathi përmban edhe proteina, kalcium dhe, në varësi të produktit, mikroorganizma nga fermentimi.
Në qendër të diskutimit është edhe vaji i ullirit ekstra i virgjër dhe vendi i tij në dietën mesdhetare.
Studimet kanë gjetur lidhje mes konsumit të vajit të ullirit dhe rrezikut më të ulët të vdekjes nga demenca, por këto janë të dhëna vëzhguese dhe nuk nënkuptojnë një trajtim apo garanci kundër Alzheimerit.
Dhe pastaj vjen agjërimi intermittent, një nga trendet më të diskutuara të ushqyerjes.
A është gjithmonë i dobishëm? Jo domosdoshmërisht. Studimet klinike kanë dhënë rezultate të ndryshme dhe përfitimet varen edhe nga cilësia e ushqimit, sasia e kalorive dhe mënyra se si zbatohet.
Pra, pyetja nuk është vetëm “sa orë nuk hamë?”, por edhe “çfarë hamë kur hamë?”
Nga insulinorezistenca te gjalpi, djathi, vaji i ullirit dhe agjërimi, Blerina Bombaj sjell një tjetër këndvështrim mbi marrëdhënien mes ushqimit dhe metabolizmit./abcnews.al
