Dhoma e Ulët e parlamentit rus, Duma, ka mbështetur një projektligj që u jep presidentëve të Rusisë dhe familjeve të tyre imunitet nga ndjekja penale edhe pasi të mos jenë në pozita udhëheqëse të shtetit.
Miratimi i këtij ligji, i cili është pjesë e ndryshimeve kushtetuese të miratuara në referendumin e mbajtur në korrik, nuk rrezikohet pasi mbështetësit e presidentit rus, Vladimir Putin dominojnë në dy dhomat e parlamentit.
Putin ka të drejtë të kandidojë edhe për dy mandate të tjera, ndonëse mandati i tij i katërt përfundon në vitin 2024.
Ky projektligj që përkujdeset për imunitetin e Putinit ka risjellë në skenë spekulimet rreth të ardhmes politike të presidentit rus.
Ai ka qenë në pushtet që prej vitit 2000, duke ushtruar ndikim dhe patronazh të madh.
Kritiku i Putinit, Alexei Navalny, pas këtyre zhvillimeve pyeti në Twitter se;
“Pse Putin ka nevojë për imunitet tani? A mund që diktatorët të tërhiqen me vullnetin e tyre të lirë?”.
Projekt-ligji kaloi një lexim të parë në Duma të martën, ku shumica e deputetëve i përkasin partisë pro-Putin “Rusia e Bashkuar”. Tridhjetë e shtatë deputetë komunistë votuan kundër.
Do të ketë edhe dy lexime të tjera të Dumës, pastaj projekt-ligji shkon në Këshillin e Federatës (dhoma e sipërme) dhe më pas tek vetë Putin për t’u firmosur.
n.d./abcnews.al
